Բժշկական նոր կենտրոն Գյումրիում

Առաջնորդվելով ՀՀ նախագահ Ս. Սարգսյանի նախընտրական ծրագրի` տարածքների համաչափ զարգացման դրույթով, ՀՀ առողջապահության նախարարությունը մշակել և իրականացնում է մարզերում միջազգային չափանիշներին համապատասխան բուժհաստատությունների կառուցման, վերակառուցման և դրանք ժամանակակից բուժսարքավորումներով հագեցնելու ծրագիր: Այդ ծրագրով արդեն իսկ հիմնանորոգվել և գործում են Արմավիրի, Արարատի, Ապարանի, Իջևանի, Հրազդանի, Գորիսի և Գավառի բժշկական կենտրոնները: 

Այս անգամ հերթը Շիրակի մարզինն էր: Աղետի գոտու բնակչության առողջության պահպանման խնդիրը կարգավորելու նպատակով Գյուլբենկյանի անվան վիրաբուժական և«Սամարիթեր» մարզային հիվանդանոցները միավորելով, Գյումրիում կառուցվեց շենքային ժամանակակից պայմաններ ունեցող բազմապրոֆիլային բժշկական նոր կենտրոն:

Նոր կենտրոնի կառուցման և վերազինման աշխատանքներն իրականացվել են Համաշխարհային բանկի կողմից ֆինանսավորվող «Առողջապահական համակարգի արդիականացում» ծրագրի վարկային միջոցներով և ՀՀ Կառավարության համաֆինանսավորմամբ:

Վերջերս աշխատանքային այցով Գյումրիում գտնվող ՀՀ նախագահ Ս. Սարգսյանը մասնակցեց նորակառույց բժշկական կենտրոնի բացման արարողությանը: 

Ողջունելով բացման մեծաթիվ մասնակիցներին, ՀՀ առողջապահության նախարար Դերենիկ Դումանյանն ասաց.«Այսօր նշանակալի օր է բոլորիս համար: Անկախ Հայաստանի 21-ամյա պատմության ընթացքում առաջին անգամ իր դռներն է բացում պետական միջոցներով կառուցված բժշկական կատարյալ մի կենտրոն: Այս նախաձեռնությունը Հայաստանի Հանրապետության նախագահ Սերժ Սարգսյանի նախընտրական ծրագրի, տարածքների համաչափ զարգացման դրույթի արտահայտությունն է: Խորհրդանշական է, որ կենտրոնը շահագործվում է 1988-ի երկրաշարժի դժվարություններն ու անհարմարությունները երկար ժամանակ կրած Գյումրիում:

Սա խիստ ժամանակակից, բազմապրոֆիլ բժշկական կենտրոն է` ախտորոշիչ հզոր հնարավորություններով, գերհագեցած վիրասրահներով, անհետաձգելի և ինտենսիվ բուժման, դիալիզի բարձրակարգ բաժանմունքներով, լաբորատոր բազմակողմանի ծառայությունով, ինչպես նաև մայրաքաղաքի և արտերկրի առաջատար կլինիկաների հետ հեռահաղորդակցային բժշկական խորհրդատվությունների իրականացման հնարավորությամբ:

Հարկ է նշել, որ կենտրոնում տեղադրված են ամենավերջին սերնդի մի շարք սարքավորումներ, որոնցից հատկապես ուզում եմ առանձնացնել համակարգչային շերտագրության սարքը և անգիոգրաֆը: Անչափ կարևորում եմ վերջինի առկայությունը, որը հնարավորություն է տալիս առաջին անգամ մայրաքաղաքից դուրս իրականացնել ինչպես ախտորոշիչ, այնպես էլ ինվազիվ բուժական միջամտություններ, և տարածաշրջանի մեր ազգաբնակչությունն այսուհետև անհրաժեշտության դեպքում հնարավորություն կունենա սրտաբանական բարձրակարգ ծառայություն ստանալ տեղում:

Ամփոփելով, վստահաբար կարող եմ ասել, որ այսօր Գյումրիում իր դռներն է բացում այնպիսի մի կենտրոն, որի հագեցվածության ու պայմանների մասին պարզապես կերազեին մայրաքաղաքի շատ կլինիկաներ: Ավելին, սա մի կենտրոն է, որը կարող է մրցել նույնիսկ աշխարհի զարգացած երկրների նույնանման կենտրոնների հետ:

Առիթից օգտվելով, ցանկանում եմ շնորհակալություն հայտնել բոլոր նրանց, ովքեր իրենց ներդրումն են ունեցել այս կենտրոնի ստեղծման գործում և հատկապես Համաշխարհային բանկի մեր գործընկերներին` աջակցության և մշտապես ակտիվ համագործակցության համար»:

ՀՀ նախագահը ՀՀ առողջապահության նախարար Դերենիկ Դումանյանի և հյուրերի հետ շրջեց կենտրոնի բաժանմունքներում, ծանոթացավ պայմաններին ու բժշկական սպասարկման հնարավորություններին:

Նոր կազմավորված բժշկական կենտրոնում նախատեսվում է 510 հաստիք, այդ թվում 119 բժիշկ-մասնագետի, 279 միջին և կրտսեր բուժաշխատողների, 22 վարչական և տեխնիկական աշխատողների: Միավորման արդյունքում բժշկական անձնակազմի կրճատումներ չեն եղել: Նոր բժշկական կենտրոնի ծառայություններից կօգտվեն ոչ միայն Շիրակի մարզի բնակիչները, այլև Ջավախքի մեր հայրենակիցները, քանի որ այդ տարածաշրջանում նման բարձրակարգ բժշկական հաստատություն չկա:

Հարցեր, պատասխաններ, մեկնաբանություններ